Oʻlchovli oltin quymalar toʻgʻrisidagi maʼlumot
Aholining investitsiya va jamgʻarish imkoniyatlarini kengaytirish, shuningdek, qimmatbaho metallar muomalasini rivojlantirish maqsadida Oʻzbekiston Respublikasi Markaziy banki oʻlchovli oltin quymalarni tijorat banklari orqali sotuvga chiqarmoqda.
Ogʻirligi 5, 10, 20 va 50 gramm boʻlgan, 999,9 soflikdagi oltindan tayyorlangan quymalar maxsus himoya qadoqlarida sotuv uchun taqdim etiladi. Oltin quymalarning qadogʻi sertifikat vazifasini bajaradi va oʻz seriya raqamiga ega boʻladi.
Oltin quymalarning sotish va qaytarib sotib olish narxlari oltinning jahon bozoridagi narxi va Markaziy bank tomonidan belgilangan marja yoki chegirma asosida shakllanadi va har kuni Markaziy bankning veb-saytida milliy valyutada eʼlon qilib boriladi.
Maʼlumot uchun: Marja va chegirma miqdorlari oʻlchovli quymalarning muomalaga chiqarilishi va muomalada boʻlishi bilan bogʻliq operatsion xarajatlarni hisobga olgan holda belgilanadi.
Qadoqlari but oltin quymalar sotuv shaxobchalarida tijorat banki tomonidan yombi egasiga toʻlovni darhol amalga oshirish orqali qaytarib sotib olinadi.
Qadogʻi buzilgan yoki texnik talablarga mos kelmaydigan oltin quymalarni qaytarib sotib olish ularni texnik ekpertizadan oʻtkazish orqali amalga oshiriladi va ekspertiza oʻtkazilgandan soʻng toʻlov toʻlab beriladi. Qadogʻi but holatdagi oltin quymalarni Oʻzbekiston Respublikasi hududidan tashqariga olib chiqishga ruxsat beriladi.
Markaziy bank esdalik tangalari to'g'risida ma'lumot
Аholining investitsiya va jamgʼarish imkoniyatlarini kengaytirish, mamlakatda qimmatbaho metallar bozori faoliyatini rivojlantirish maqsadida hamda jahon tajribasi va amaliyotidan kelib chiqib, Oʼzbekiston Respublikasi Markaziy banki oltin va kumushdan tayyorlangan esdalik tangalarni muomalaga chiqarish boʼyicha tajriba loyihasini amalga oshirmoqda.
Sotuvga 1994-2009 yillarda zarb etilgan, 2 xil oltin hamda 14 xil kumush esdalik tangalari qoʼyilgan boʼlib, ularning asillik darajasi 999,9 hamda ogʼirligi 31,1 grammdan1 iborat.
Sotuvga jami 1900 dona oltin hamda 6900 dona kumush esdalik tangalari qoʼyilgan. Quyidagi jadvalda batafsil maʼlumotlar keltirilgan.
Mazkur esdalik tangalar ularning texnik xususiyatlarini tasdiqlovchi asillik sertifikatlari bilan sotuvga chiqariladi. Tangalar “PROOF” sifatiga muvofiq tayyorlangan.
Esdalik tangalarni sotish narxi Markaziy bank tomonidan har haftada kamida bir marta milliy valyutada belgilanadi.
2018 yil 28 noyabrdan boshlab esdalik tangalarini tijorat banklarining ayrim filiallarida naqd va naqd pulsiz hisob-kitoblar asosida sotib olish mumkin
Oʼzbekiston Respublikasi davlat mustaqilligining oʼttiz yilligiga bagʼishlangan oltin va kumush esdalik tangalari toʼgʼrisidagi maʼlumot
Markaziy bank tomonidan 2021 yilning 30 avgustidan boshlab Oʼzbekiston Respublikasi davlat mustaqilligining oʼttiz yilligiga bagʼishlangan oltin va kumushdan tayyorlangan esdalik tangalari sotuvga chiqarildi.
Ushbu esdalik tangalarining dizaynlari Oʼzbekiston Badiiy akademiyasining mutaxassislari bilan hamkorlikda ishlab chiqildi.
Sotuvga 2 xil dizayn va oʼlchovga ega boʼlgan jami 400 dona oltin tangalar chiqarilgan boʼlib, ularning 200 donasi 15 gramm va 200 donasi 20 gramm ogʼirlikdagi tangalardir.
Shuningdek, sotuvga ogʼirligi 31,1 grammdan iborat 2 xil dizayndagi jami 2000 dona kumush tangalar chiqarilgan. Barcha esdalik tangalari 999,9 asillik darajasiga ega qimmatbaho metallardan tayyorlangan.
Esdalik tangalarining sotuv narxlari Markaziy bank tomonidan har kuni milliy valyutada belgilanadi va eʼlon qilinadi.
Аlisher Navoiy tavalludining 580 yilligiga bagʼishlangan oltin esdalik tangalari va suvenirlar toʼplamlari toʼgʼrisidagi maʼlumot
Oʼzbekiston Respublikasi Markaziy banki 2021 yil 16 martdan boshlab buyuk shoir va mutafakkir Аlisher Navoiy tavalludining 580 yilligiga bagʼishlangan oltindan tayyorlangan esdalik tangalari va suvenirlar toʼplamlarini sotuvga chiqardi.
Sotuvga Аlisher Navoiy siymosi aks ettirilgan 2 xil dizayndagi oltin esdalik tangalari hamda shoirning “Xamsa” asariga kiritilgan dostonlarning qahramonlari aks ettirilgan 5 xil koʼrinishdagi oltin tangalardan iborat suvenirlar toʼplamlari qoʼyilgan.
Sotuvga jami 1200 dona oltin esdalik tangalari qoʼyilgan boʼlib, ulardan 1000 donasi 20 gramm va 200 donasi 31,1 gramm ogʼirlikdagi tangalardir.
Suvenirlar toʼplamlari har biri 20 gramm yoki 31,1 gramm ogʼirlikdagi 5 dona tangadan iborat boʼlib, ularning tiraji cheklanmagan. Esdalik tangalari va suvenirlar toʼplamlari 999,9 asillik darajasiga ega oltindan tayyorlangan.
Esdalik tangalari va suvenir toʼplamlarining sotuv narxlari Markaziy bank tomonidan har kuni milliy valyutada belgilanadi va eʼlon qilinadi.
